ລັດຖະມົນຕີກະຊວງກະສິກໍາ ແລະ ປ່າໄມ້ເຂົ້າຮ່ວມສະຫຼຸບສົກຮຽນຢູ່ໂຮງຮຽນຊົນລະປະທານຊັ້ນສູງທ່າງ່ອນ

ໃນຕອນບ່າຍຂອງວັນທີ 13 ກັນຍາ 2023 ຢູ່ທີ່ໂຮງຮຽນຊົນລະປະທານຊັ້ນສູງ ທ່າງ່ອນ ໃດ້ຈັດພິທີສະຫຼຸບປິດສົກຮຽນ 2022-2023 ແລະ ເປີດສົກຮຽນໃໝ່ 2023-2024 ຂອງໂຮງຮຽນຊົນລະປະທານຊັ້ນສູງ ທ່າງ່ອນ ຂຶ້ນຢ່າງເປັນທາງການ ເຊີ່ງໃຫ້ກຽດເປັນປະທານໃນຄັ້ງນີ້ ແມ່ນ ທ່ານ ປອ. ເພັດ ພົມພີພັກ ລັດຖະມົນຕີກະຊວງກະສິກຳ ແລະ ປ່າໄມ້, ມີບັນດາແຂກທີ່ຖືກເຊີນຈາກບັນດາກົມກອງອ້ອມຂ້າງຈຳນວນ 28 ພາກສ່ວນ ເຂົ້າຮ່ວມ, ມີບັນດາຫົວໜ້າ ອໍານວຍການໂຮງຮຽນພ້ອມຄະນະອໍານວຍການ, ຫົວໜ້າຫ້ອງການ ແລະຮອງ, ຫົວໜ້າຄະນະວິຊາ ແລະ ຮອງ ພ້ອມດ້ວຍພະນັກງານຄູອາຈານ, ອ້າຍນ້ອງນັກສຶກສາທັງ 3 ຄະນະວິຊາ ເຂົ້າຮ່ວມຢ່າງພ້ອມພຽງ, ໃນພິທີດັ່ງກ່າວ ທ່ານ ອານຸສອນ ຄຸນສົມບັດ ອຳນວຍການໂຮງຮຽນຊົນລະປະທານຊັ້ນສູງ ທ່າງ່ອນ ໃດ້ຂຶ້ນຜ່ານບົດສະຫຼຸບຂອງການຈັດຕັ້ງປະຕິບັດການເຄື່ອນໃຫວວຽກງານຜ່ານມາ ລວມທັງຮຽນການສອນ ແລະ ການວາງແຜນການຈັດຕັ້ງປະຕິບັດວຽກງານໃນຕໍ່ໜ້າປະຈຳປີ 2024 ໃຫ້ປະກົດຜົນເປັນຈິງ ຈາກນັ້ນທ່ານປະທານກໍ່ໃດ້ມອບໃບປະກາສະນິຍະບັດໃຫ້ແກ່ບັນດານັກສຶກສາທີ່ຮຽນຈົບຫຼັກສູດ ປະຈຳປີ 2023 ຈໍານວນທັງໝົດ 42 ຄົນ, ຍິງ 8 ຄົນ, ເຊີ່ງລວມມີ 3 ສາຂາ ເຊັ່ນ: ສາຂາວິສະວະກໍາຊົນລະປະທານຈໍານວນ 25 ຄົນ,ຍິງ 3 ຄົນ, ສາຂາວິສະວະກໍາຊັບພະຍາກອນນ້ຳມີ 9 ຄົນ, ຍິງ 5 ຄົນ, ສາຂາກົນຈັກກະສິກໍາ 8 ຄົນ, ຍິງ 0 ຄົນ, ເຊິ່ງໃນນັ້ນ ຍັງມີບັນດານັກສຶກສາທີ່ມີຜົນງານຂອງການຮ່ຳຮຽນ ແລະ ຕິດພັນກັບການສ້າງຂະບວນການເຄື່ອນໄຫວຕ່າງໆພາຍໃນໂຮງຮຽນຕະຫຼອດໄລຍະເວລາ 3 ປີ ມີຜົນງານດັ່ງລຸ່ມນີ້: ໃດ້ຮັບໃບຍ້ອງຍໍ ເດັ່ນຮອບດ້ານ ຈຳນວນ 20 ຄົນ, ຍິງ 4 ຄົນ ກວມເອົາ 48 %; ໄດ້ຮັບໃບຍ້ອງຍໍດີເດັ່ນດ້ານກ່ານຮຽນ ຈຳນວນ 6 ຄົນ, ຍິງ 4 ຄົນ ກວມເອົາ 14 %, ໃດ້ຮັບໃບຊົມເຊີຍເດັ່ນດ້ານການອອກແຮງງານ, ການປະກອບສ່ວນ ຈຳນວນ 16 ຄົນ, ຍິງ 0 ຄົນ, ສໍາເລັດຂອງການມອບໃບປະກາສະນິຍິບັດໃຫ້ແກ່ນັກສຶກສາແລ້ວ ທ່ານປະທານຍັງໃດ້ໂອ້ລົມຕໍ່ກອງປະຊຸມຕື່ມ ໂດຍສະເພາະ ທ່ານໄດ້ເນັ້ນໃສ່ການກໍ່ສ້າງບຸກຄະລາກອນ ດ້ານກະສິກຳ ແລະ ປ່າໄມ້ ເວົ້າລວມ, ເວົ້າສະເພາະ ວິຊາການດ້ານຊົນລະປະທານ, ຊັບພະຍາກອນນໍ້າ, ກົນຈັກກະສິກໍາ. ແມ່ນວຽກງານບຸລິມະສິດຂອງການພັດທະນາຊັບພະຍາກອນມະນຸດທີ່ລັດຖະບານ ໄດ້ໃຫ້ຄວາມສຳຄັນເພື່ອຕອບສະໜອງບຸກລະກອນໃນການຈັດຕັ້ງປະຕິບັດ ແຜນພັດທະນາກະສິກຳ ປ່າໄມ້, ພັດ ທະນາຊົນນະບົດ 5 ປີ ຄັ້ງທີ IX (2021-2025)ນອກຈາກນັ້ນເພິ່ນຍັງເນັ້້ນໃສ່ບັນດານັກສຶກສາທີ່ຈົບໃໝ່ແມ່ນໃຫ້ສືບຕໍ່ເອົາໃຈ ໃສ່ຄົ້ນຄວ້າເຊື່ອມຊຶມແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ຮ່ຳຮຽນເອົາແບບແຜນວິທີເຮັດວຽກທີ່ດີ, ຖອດຖອນເອົາບົດຮຽນຈາກຜູ້ທີ່ມີຜົນສຳເລັດໃນການປະກອບອາຊີບ, ສ້າງໃຫ້ຄົນເປັນບຸກຄະກອນທີ່ມີຄຸນນະພາບຂອງການຈັດຕັ້ງ, ມີຄຸນ ສົມບັດດີ, ມີທັດສະນະຄະຕິທີ່ດີ, ຍົກສູງຄວາມຮັບຜິດຊອບຕໍ່ໜ້າທີ່ວຽກງານ, ເຊີ່ງພວກເຮົາທຸກຄົນຮູ້ດີແລ້ວວ່າ ການກໍ່ສ້າງ ແລະ ພັດທະນາຄົນ ບໍ່ແມ່ນສະໜອງໃຫ້ແຕ່ການຈັດຕັ້ງຂອງລັດເທົ່ານັ້ນ, ແຕ່ຍັງເປັນການສະໜອງໃຫ້ແກ່ຂະແໜງການຂອງພາກເອກະຊົນ ແລະ ສັງຄົມທົ່ວໄປອີກດ້ວຍ, ຈາກນັ້ນຕາງໜ້ານັກສຶກສາກໍ່ໄດ້ຂຶ້ນກ່າວຮັບຄໍາໂອວາດຈາກທ່ານປະທານທີ່ໄດ້ກ່າວມາເພື່ອນໍາເອົາທິດຊີ້ນໍາຂອງທ່ານປະທານໃປພັດທະນາຕົນເອງໃນຕໍ່ໜ້າ; ພາບ-ຂ່າວ: ຈິດວິໄລ ຍົດສົມບັດ ໂຮງຮຽນຊົນລະປະທານ ຊັ້ນສູງທ່າງ່ອນ