Logo
ຮັບປະກັນຄວາມຖືກຕ້ອງ, ວ່ອງໄວ, ໂປ່ງໃສ, ພັດທະນາບຸກຄະລາກອນ-ການຈັດຕັ້ງ ໃຫ້ເຂັ້ມແຂງ ມີປະສິດທິພາບ! ວິໄສທັດການພັດທະນາຊັບພະຍາກອນມະນຸດຂອງກະຊວງກະສິກຳ ແລະ ປ່າໄມ້: ພັດທະນາຊັບພະຍາກອນມະນຸດຂອງກະຊວງກະສິກໍາ ແລະ ປ່າໄມ້ ໃຫ້ມີຄວາມພ້ອມດ້ານຄວາມຮູ້ຄວາມສາມາດ, ຄຸນສົມບັດສິນທຳປະຕິວັດ ໃນການນໍາພາຄຸ້ມຄອງ, ການຄົ້ນຄວ້າດ້ານ ເຕັກນິກວິທະຍາສາດ, ການສົ່ງເສີມບໍລິການເຕັກນິກວິຊາການ ເພື່ອປະຕິບັດແຜນພັດທະນາກະສິກໍາ, ປ່າໄມ້ ແລະ ພັດທະນາຊົນນະບົດ ໃຫ້ມີປະສິດທິພາບ ແລະ ປະສິດທິຜົນ.

ພະແນກກະສິກຳ ແລະ ປ່າໄມ້ແຂວງຫົວພັນ ສຳເລັດພິທີປະກາດການປັບປຸງກົງຈັກການຈັດຕັ້ງ

ໃນຕອນເຊົ້າວັນທີ 02 ກັນຍາ 2022ພະແນກກະສິກຳ ແລະ ປ່າໄມ້ແຂວງຫົວພັນ ໄດ້ຈັດຕັ້ງພິທີປະກາດການປັບປຸງກົງຈັກການຈັດຕັ້ງ ຂຶ້ນທີ່ຫ້ອງປະຊຸມພະແນກກະສິກຳ ແລະ ປ່າໄມ້ແຂວງຫົວພັນ ໄດ້ຮັບກຽດເປັນປະທານ ໂດຍ ທ່ານ ຮິນທອງ ດວງຈັນສຸກ ຄະນະປະຈຳພັກແຂວງ ປະທານກວດກາພັກ-ລັດແຂວງ ແລະ ໄດ້ມີ ທ່ານ ໄຈເພັດ ເຮືອງຖາວອນ ຮັກສາການຫົວໜ້າພະແນກກະສິກຳ ແລະ ປ່າໄມ້ແຂວງ, ບັນດາທ່ານຈາກພາກສ່ວນກ່ຽວຂ້ອງຂອງແຂວງ, ມີການນຳພະແນກ, ຂະແໜງການທີ່ຂຶ້ນກັບພະແນກ, ຫ້ອງການກະສິກຳ ແລະ ປ່າໄມ້ເມືອງ ຕະຫຼອດຮອດພະນັກງານລັດຖະກອນພາຍໃນພະແນກເຂົ້າຮ່ວມ.

ທ່ານ ນາງ ແພງພາສຸກ ແກ້ວບົວສະໄໝ ຮອງຄະນະຈັດຕັ້ງແຂວງ ໄດ້ຜ່ານຂຶ້ນ ຂໍ້ຕົກລົງ ທ່ານເຈົ້າແຂວງ ສະບັບເລກທີ 1058/ຈຂ.ຫພ ລົງວັນທີ 22 ສິງຫາ 2022 ວ່າດ້ວຍການແຕ່ງຕັ້ງ ທ່ານ ບຸນພອນ ບຸດພະຈັນ ຫົວໜ້າຂະແໜງແຜນການ ແລະ ການເງິນ ເປັນຮອງຫົວໜ້າພະແນກກະສິກໍາ ແລະ ປ່າໄມ້ແຂວງຫົວພັນ.

ທ່ານ ຮິນທອງ ດວງຈັນສຸກ ປະທານກອງປະຊຸມ ໄດ້ໃຫ້ຄໍາໂອ້ລົມຕໍ່ກັບ ພະນັກງານລັດຖະກອນຫຼາຍບັນຫາ ເປັນຕົ້ນແມ່ນ ໃຫ້ເຂົ້າໃຈຕໍ່ກັບການປັບປຸງສັບຊ້ອນການຈັດຕັ້ງ ຖືເປັນວຽກປົກກະຕິຂອງການຈັດຕັ້ງ ໂດຍປະຕິບັດຕາມຫຼັກການລວມສູນປະຊາທິປະໄຕ, ເຮັດຕາມຂັ້ນຕອນ ແລະ ລະບຽບການ; ເພື່ອຜັນຂະຫຍາຍສອງວາລະແຫ່ງຊາດ ໃຫ້ຄະນະພັກເອົາໃຈໃສ່ ສຶກສາອົບຮົມການເມືອງແນວຄິດ, ປັບປຸງແບບແຜນວິທີການເຮັດວຽກ, ເຮັດວຽກເປັນໝູ່ຄະນະ, ເປັນແບບຢ່າງໃຫ້ມະຫາຊົນ, ເຮັດວຽກງານໃຫ້ຖືກຕ້ອງລະບຽບຫຼັກການ, ຖືກຕ້ອງຕາມເຕັກນິກວິຊາການ, ການສັບຊ້ອນພະນັກງານໃຫ້ເໝາະສົມກັບຕຳແໜ່ງງານ ແລະ ຖືກຕ້ອງຕາມວິຊາສະເພາະທີ່ຕົນເອງໄດ້ຮຽນມາ, ເຮັດວຽກງານໃຫ້ສອດຄ່ອງ ແລະ ມີຄວາມສຳເລັດຕາມແຜນການທີ່ວາງໄວ້ ແລະ ສົ່ງເສີມການປູກ-ການລ້ຽງ ຜະລິດຫຼາຍໃຫ້ກາຍເປັນສິນຄ້າ ຜະລິດເປັນຈຸດສຸມ ແນໃສ່ຕອບສະໜອງໃຫ້ພຽງພໍກັບຄວາມຮຽກຮ້ອງຕ້ອງການຂອງທ້ອງຕະຫຼາດ ເພື່ອເປັນການສ້າງລາຍຮັບໃຫ້ປະຊາຊົນ ໃຫ້ຫຼຸດພົ້ນອອກຈາກ ຄວາມທຸກຍາກເທື່ອລະກ້າວ.

ພາບ-ຂ່າວ: ຄຳພະແກ້ວ ອິນທະວົງ