ພິທີປາຖະກະຖາເນື່ອງໃນວັນສໍາຄັນຂອງຊາດ ແລະ ປະກາດການຈັດຕັ້ງພະນັກງານນໍາພາຂັ້ນກະຊວງຄຸ້ມຄອງ

ໃນວັນທີ 25 ກໍລະກົດ 2024, ທີ່ສະໂມສອນກະຊວງກະສິກໍາ ແລະ ປ່າໄມ້ໄດ້ມີ ພິທີປາຖະກະຖາເນື່ອງໃນວັນສໍາຄັນຂອງຊາດ ແລະ ການປະກາດການຈັດຕັ້ງພະນັກງານນໍາພາຂັ້ນກະຊວງຄຸ້ມຄອງ ຂື້ນ ໂດຍໃຫ້ກຽດເປັນປະທານ ແລະ ປາຖະກະຖາຄັ້ງນີ້ຂອງ ສະຫາຍ ລິນຄໍາ ດວງສະຫວັນ ກໍາມະການສໍາຮອງສູນກາງພັກ, ເລຂາຄະນະພັກ, ລັດຖະມົນຕີກະຊວງກະສິກໍາ ແລະ ປ່າໄມ້, ເຂົ້າຮ່ວມມີ ຮອງເລຂາຄະນະພັກກະຊວງ, ກໍາມະການຄະນະພັກກະຊວງ, ເລຂາຮອງເລຂາຄະນະພັກຮາກຖານ, ໜ່ວຍພັກຮາກຖານ, ຫົວໜ້າ, ຮອງຫົວໜ້າກົມ ແລະ ທຽບເທົ່າ , ປະທານ 3 ອົງການຈັດຕັ້ງມະຫາຊົນ ພ້ອມດ້ວຍສະມາຊິກພັກພະນັກງານເຂົ້າຮ່ວມທັງໝົດ 186 ທ່ານ, ຍິງ 54 ທ່ານ, ໃນພິທີຜູ້ເຂົ້າຮ່ວມໄດ້ຮັບຟັງ ການເຜີຍແຜ່ປາຖະກະຖາ 3 ເນື້ອໃນເອກະສານຄື ການລະນຶກເຖິງວັນຄ້າຍວັັນເກີດຂອງປະທານສຸພານຸວົງ ຄົບຮອບ 115 ປີ, ວັນເຊັນສົນທິສັນຍາ ມິດຕະພາບ-ການຮ່ວມມື ຄົບຮອບ 47 ປີ ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 62 ປີ ເປົ້າໝາຍເພື່ອເປັນການສຶກສາອົບຮົມໃຫ້ບັນດາຄະນະພັກຮາກຖານ, ຄະນະໜ່ວຍພັກຮາກຖານ, ຄະນະໜ່ວຍພັກ, ສະມາຊິກພັັັັັັັກ, ພະນັກງານລັດຖະກອນ ໄດ້ຮັບຮູ້ ເຂົ້າໃຈຢ່າງເລິກເຊິ່ງຕໍ່ມູນເຊື້ອອັນດີງາມ, ເພື່ອລະນຶກເຖິງຜົນງານ, ຄຸນງາມຄວາມດີ ຂອງປະທານ ສຸພານຸວົງ ທີ່ແສນເຄົາລົບຮັກຂອງຊາດ ໃນພາລະກິດຕໍ່ສູ້ປົດປ່ອຍຊາດ, ກໍ່ຄືການປະຕິບັດ 2 ໜ້າທີ່ຍຸດທະສາດການປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການຊີ້ນໍາ-ນໍາພາ ຂອງພັກ, ວັນເຊັນສົນທິສັນຍາມິດຕະພາບ-ການຮ່ວມມື ຄົບຮອບ 47 ປີ ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມຄົວຮອບ 62 ປີ

ພ້ອມດຽວກັນນີ້ ໃນພິທີຍັງໄດ້ມີການປະກາດການຈັດຕັ້ງ ພະນັກງານ ນໍາພາຂັ້ນກະຊວງຄຸ້ມຄອງຈໍານວນທັງໝົດ 7 ທ່ານ ທີ່ເຂົ້າຮັບອຸດໜູນບໍານານ ແລະ ປະກາດແຕ່ງຕັ້ງຮັບຕໍາແໜງໃໝ່ ໂດຍໃຫ້ກຽດອ່ານຂໍ້ຕົກລົງຂອງ ທ່ານ ບຸນທະວີ ໄຊຍະເພັດ ຫົວໜ້າກົມຈັດຕັ້ງ ແລະ ພະນັກງານ ມີລາຍຊື່ດັ່ງນີ້:

1. ປະກາດພະນັກງານລັດຖະກອນເຂົ້າຮັບອຸດໜຸນບໍານານ 02 ທ່ານ ຄື:

ທ່ານ ທອງສະຫວັນ ພັນທະລາວົງ ຮອງຫົວໜ້າກົມຈັດຕັ້ງ ແລະ ພະນັກງານ.

ທ່ານ ຄໍາຜຸຍ ເທບວົງສາ ຮອງຫົວໜ້າກົມກວດກາປ່າໄມ້.

2. ປະກາດແຕ່ງຕັ້ງຮອງຫົວໜ້າກົມ ຈໍານວນ 5 ທ່ານ ຄື:

- ທ່ານ ນ. ຄໍາພິລາວັນ ອິນທະສອນ ເປັນຮອງຫົວໜ້າກົມຈັດຕັ້ງ ແລະ ພະນັກງານ;

- ທ່ານ ສົມສະເໝີ ດວງດາວົງ ເປັນຮອງຫົວໜ້າກົມຈັດຕັ້ງ ແລະ ພະນັກງານ;

- ທ່ານ ທອງເລີຍ ແສງອານົງ ເປັນຮອງກົມຊົນລະປະທານ;

- ທ່ານ ພອນວິໄລ ຫຼວງຄໍາຫານ ເປັນຮອງຫົວໜ້າກົມສົ່ງເສີມກະສິກໍາ ແລະ ສະຫະກອນ;

- ທ່ານ ສຸວັນທອງ ນາມວົງ ເປັນຮອງຫົວໜ້າກົມສົ່ງເສີມກະສິກໍາ ແລະ ສະຫະກອນ.

ໃນຕອນທ້າຍຂອງພິທີ ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກໍາ ແລະ ປ່າໄມ້ ຍັງໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນໍາ ໂດຍໄດ້ເນັ້ນໃຫ້ບັນດາກົມ, ສູນ, ສະຖາບັນທີ່ປິ່ນອ້ອມອອກແຮງຊຸກຍູ້ໜ້າວຽກຈຸດສຸມຂອງກະຊວງກະສິກໍາ ແລະ ປ່າໄມ້ ໂດຍສະເພາະການຈັດຕັ້ງປະຕິບັດວາລະແຫ່ງຊາດ ການຜະລິດພາຍໃນ ເພື່ອຫຼຸດຜ່ອນການນໍາເຂົ້າ ແລະ ການສົ່ງເສີມໃຫ້ເປັນສິນຄ້າສົ່ງອອກ, ຕໍ່ກັບບັນດາທ່ານທີ່ໄດ້ຮັບການແຕ່ງຕັ້ງໃໝ່ກໍ່ໃຫ້ບັນດາກົມຈັດແບ່ງຄວາມຮັບຜິດຊອບໜ້າທີ່ຄວາມຮັບຜິດກັນຢ່າງລະອຽດ ພ້ອມທັງຮຽກຮ້ອງໃຫ້ຜູ້ໄດ້ຮັບຕໍາແໜງໃໝ່ ຈົ່ງສຸມໃສ່ຝຶກຝົນຫຼໍ່ຫຼອມຕົນເອງຢ່າງຮອບດ້ານ ເປັນແບບຢ່າງທີ່ດີ ເພື່ອເປັນກໍາລັງແຮງໃນການຊຸກຍູ້ຜັກດັນຂະແໜງການກະສິກໍາ, ປ່າໄມ້ ແລະ ພັດທະນາຊົນນະບົດ ໃຫ້ມີຄວາມເຂັ້ມແຂງ.

ແຫຼ່ງຂ່າວ: ຂ່າວສານກະສິກຳ, ປ່າໄມ້ ແລະ ພັດທະນາ ຊົນນະບົດ; ພາບຖ່າຍ: ທະນົງ ສຸມິດຕອມ