ພິທີວາງສີລາລຶກ ກໍ່ສ້າງໂຄງການບູລະນະຖ້ຳກະສິກຳ ທີ່ເມືອງວຽງໄຊ

ພິທີໄດ້ຈັດຂື້ນໃນວັນທີ 17 ພຶດສະພາ 2023 ຢູ່ທີ່ຖ້ຳກະສິກຳ ເມືອງວຽງໄຊ ແຂວງຫົວພັນ ໂດຍເປັນກຽດເຂົ້າຮ່ວມຂອງ ທ່ານ ນາງ ພວງເພັດ ປູວັງ ຄະນະປະຈໍາພັກກະຊວງ, ຫົວໜ້າ ກົມກວດກາ ກະຊວງກະສິກຳ ແລະ ປ່າໄມ້ ມີຄະນະຮັບຜິດຊອບ ແລະ ພາກສ່ວນກ່ຽວຂ້ອງຂັ້ນກະຊວງ, ຂັ້ນແຂວງ, ຂັ້ນເມືອງ, ບໍລິສັດຜູ້ຮັບເໝົາ ຕະຫຼອດຮອດແຂກຖືກເຊີນເຂົ້າຮ່ວມ; ໃນພິທີ ຜູ້ເຂົ້າຮ່ວມໄດ້ຮັບຟັງປະຫວັດຄວາມເປັນມາໂດຍຫຍໍ້ຂອງໂຄງການກໍ່ສ້າງຖໍ້າກະສິກຳ ເມືອງວຽງໄຊ ຕັ້ງຢູ່ບ້ານພູໄຊ ເມືອງວຽງໄຊ ແຂວງຫົວພັນ ຈາກຄະນະຮັບຜິດຊອບ, ແຕ່ກ່ອນເຄີຍເປັນສະຖານທີ່ເກັບມ້ຽນສະບຽງອາຫານເພື່ອສະໜອງໃຫ້ແນວໜ້າໃນການຕໍ່ສູ້ກູ້ຊາດໃນປະຫວັດສາດຜ່ານມາ ແລະ ເປັນສະຖານທີ່ໜຶ່ງທີ່ມີຄວາມໝາຍຄວາມສຳຄັນທາງປະຫວັດສາດ ເມື່ອເຫັນໄດ້ຄວາມສຳຄັນດັ່ງກ່າວ ມາຮອດປີ 2018 ຄະນະພັກແຕ່ລະຂັ້ນ ແລະ ພາກສ່ວນກ່ຽວຂ້ອງຂັ້ນເມືອງໄດ້ສົມທົບກັນເພື່ອເລີ່ມຕົ້ນບູລະນະກໍ່ສ້າງ ຕາມແຜນການກໍ່ສ້າງໄດ້ມີຫຼາຍໜ້າວຽກເປັນຕົ້ນ ກໍ່ສ້າງອາຄານຫ້ອງການ, ໜ້າວຽກປັບປຸງພາຍໃນຖ້ຳ, ກໍ່ສ້າງຫໍພັກ ພະນັກງານ, ກໍ່ສ້າງຫ້ອງນ້ຳສາທາລະນະ, ກໍ່ສ້າງອາຄານຂາຍເຄື່ອງທີ່ລະນຶກ ແລະ ຜະລິດຕະພັນກະສິກຳ ແລະ ປະກອບເຟີນີເຈີ ພາຍໃນຖ້ຳ ລວມມູນຄ່າ 3,511,184,577 ກີບ ຄາດວ່າຈະໃຫ້ສໍາເລັດພາຍໃນ 1 ປີນັບແຕ່ມື້ລົງມືຈັດຕັ້ງປະຕິບັດ.
ພາບ-ຂ່າວໂດຍ: ມິຖຸນາ ອິນທະວົງ (ກົມກວດກາ)